من أول ما وعيت ع الدنيا 4 – 5 سنين.. بدأ احتياجي للأنثى~
في صغري كنت احضر العزايم والمناسبات العائلية وتعزم امي صديقاتها مع اولادها وبناتها الي بعمري~
وكان عندنا جيران سوريين ولدهم وبنتهم حلوين ماشاءالله تبارك الله والبنت كانت اعتقد اسمها جمانه اكبر مني والولد اسمو سعيد اعتقد بعمري او اصغر~
من وقتها حسيت عندي احتياج للأنثى~
وبدأ الاحتياج يزيد الى اليوم, قبل انفصال امي كنت اعرف الفرق بين الانثى والذكر واحساسي ما كان منحاز لجنس معين.. بس احس بحاجة تواجد انثى لي وحدي زي ما كنت احب حلوياتي والعابي وكل شي لي وحدي.
كان عندي اخ اكبر مني بسنه واخ اكبر مني تقريبا بـ4 أو5 سنين, حملت امي.. وكنت اقول فنفسي يارب يكون المولود اخت~
لكن اتذكر قبل ولادت امي سألوني الممرضات فالمستشفى تبغى ولد ولا بنت ؟ قلت بنت سألوني الممرضات ليه طبعا انا ببين نفسي اني زاحف وقوي~
قلت عشان اسويها كوره واشوتها.. لكن داخلي اردد يارب بنت يارب بنت فيها من الأنوثه ما يكفي لتعويضي عن عنصر الأنوثة.. الحمدلله جات بنت.. سنتين ثلاثه تقريبا وانفصلت امي عن ابوي.. بس قبل لا تغادرنا امي وصتني على اختي بحكم قرب العمر بينا.. وكنت اهتم فيها صح ما عندي العنصر الامومي لكن قد ما اقدر كنت اهتم بيها واعلمها تمشط شعرها وكيف لازم تكون دايما حلوه~
الى ان كبرت شويه وصارت تهتم بنفسها بنفسها.. كنت لا ازال احاول انمي فيها الانوثه.. بس طبعا فشلت لأني ذكر فالنهايه لكن حاولت.
بدأت كيمياء جسمي تنادي في الشي الحلو الي اسمو انثى زي الي اشوفها سواءا فعزيمه او غيرها.. وبدأت حاجتي تزيد سنه ورا سنه كنت رومنسي جدا~
وقتها فالبلد كانت الانثى ضعيفه فأنا دايما كنت أوقف بصفها.. والله يا جماعة الخير من وقتها كان في بنت بخيالي اخترتها لحين لقائها كنت دايما اشتريلها هدايا الي ابغا اهديها لفتاة احلامي, المهم اتذكر مره رحت محل اسمو فناتير محل حق العاب ذكية تنمي التفكير.. رحت مع ولد خالتي وأخذت لحبيبتي الي هي مجرد بنت فخيالي منذ الطفولة الين التقيت في بالبنت المسحوره الي هذي التدوينه عنها.. المهم ارجع اكمل القصه.. بمحل فناتير اخذت ورده خشبيه ذكيه تفتحها وتطلع بشكل حلو قال البياع تبغاها لمين وهو يبتسم ويسكر عينو شوي قال لولد خالتي ترى هما كذا دايما الي هادين ودايما ساكتين هما الي ينخاف منهم~
وجلسنا نضحك فالمحل, المهم مرت الايام والاسابيع والشهور والسنين.. عرفت بنات كثير مره.. يمكن اربعين او خمسين بنت.. يمكن ستين الله اعلم بس لا تحسبني داشر~
كنت دايما اتعرف بنية الزواج.. لكن مافي بنت تمكنت من تحقيق حلمي معاها.. اصلا مافي بنت جاده انا من طفولتي عندي فكرة مقدسه راسخه فعقلي اني ما ابغا اطلع مع بنت الا الي رح تكون زوجتي ولا حتا بكلم بنت فالتلفون الا الي حتزوجها.. ابغا اتعرف عليها احبها وتحبني نطلع خلسه من ورا كل الناس لين نشبع من فترة بداية الحب وبعدين نتزوج, لكن ما عمري طلعت مع بنت.. في بنت كنا ناويين نطلع وهيا الي حتمرني وتاخذني ونطلع كوفي بس اصلا هذي الفرصه الوحيده الي كان ممكن اطلع مع بنت فيها وما طلعت طلعلها ظرف البنت ورجعت البيت.. وفي بنت ثانيه نجود اسمها وعدتها بخرجه فبرج الفيصليه~
وحكيتها عن فخامة المطعم والكوفي شوب الي فالفيصليه لكن ما طلعنا كنت اكلمها وانقطعنا كذا بدون اي سبب وجات بعد فتره قالت انو انا وعدتها بطلعه للفيصليه وسحبت عليها قلتلها خلص ما عليكي.. ويعني خربت السالفه ومن سالفه على سالفه وضاعت سالفتها وعاد كل واحد عايش حياته ولا كأن صارت السالفه اصلا.. ومشت حياتي تتصل بنت ومن بنت لبنت لين انا طفشت مابغا اتصال وبس.. ابغا زواج, حتى اول مراجعه لدكتور نفسي قبل لا ادخل عند الدكتور لازم امر ع الاخصائية اول تشخصني وبعدين الاستشاري.. المهم ذاك اليوم كان اول مراجه فحياتي لدكتور نفسي عمري 17 المهم دخلت عندها قالتلي اهلين عبدالله اش عندك.. ابتسمت انا قلتلها والله مدري.. فجأه كلمتني بجديه وانها الحين ما تمزح تتكلم جد قالت انت ليش جاي قلت آه.. قلت انا ماني مستقر وابغا بيت وابغا سياره وابغا اتزوج ابتسمت وقالت عبدالله انت عمرك 17 !! قلتلها طيب واذا صار 17 خلاص مالي حق بشي كتبت فالملف وقالت طيب وحولتني ع الدكتور.. الدكتور سمع كلامي ووصفلي حبوب اكتئاب وانتهت الجلسه, ومن وقتها وانا الحمدلله اتعاطى حبوب اكتئاب, مرت السنين.. وانا حياتي الكترونيه حياتي عباره عن انترنت فقط, منتديات وشاتات.. ومواقع تواصل اجتماعي, جا يوم من الايام لقيت موقع تواصل اجتماعي ما سجلت في, انا طول الوقت متعلق بأي قشه على امل الاقي زوجتي الي مفتقدها من طفولتي, المهم لقيت موقع تواصل اجتماعي سجلت في.. ومن خلال الصور قاعد اختار مين احتك فيها ومين لا,
هنا بوز شويه (وقفه) عندي سالفه بقولها.. سبحان الله احب انا علم النفس لأني فاهم فيه قبل لا ادرس ولا اقرا شي عن علم النفس, مره ماني فاكر اش الموقع بس دخلت على شات على بنت شفت صورتها كانت حاطه صورة بنت من النت عاديه صوره بجوده عاليه زي النجوم وكذا.. قلتلها انتي شعرك مشرشر ولونو تقريبا بني وانتي مو بيضا انتي سمرا وقاعد اعطيها معلومات شكليه عنها, بعدين بدأنا نتكلم وتعرفني واعرفها قالتلي والله انت من اول ما قلت شعرك مشرشر ومو اسود وانتي سمره لميت شعري ورجعت ظهري ع الكرسي وقعدت عدل عاد انا قعدت اضحك 😂.. وقعدت انا افهمها كيف عرفت وانو انا مو مخابرات ولا شايفها ولا اعرفها.. وشرحتلها كيف تعرف شكل المتحدث من خلال صورتو. المهم نرجع لموضوعنا..
المهم لقيت موقع تواصل اجتماعي مو مسجل في انا سجلت طبعا وقاعد اتفرج ع الاكاونتات الي في ولقيت صورت بنت نفس البنت الي انا دايما نفسي تكون ليا واتمناها كزوجه لي وحدي وانا لها وحدهاوكانت دايما البنت الي فخيالي أقرب وصف لها انها زي بنات الايمو عرفتوهم الفئه الي اسمهم ايمو تكون غريبة الاطوار نحيفه وقصيره وبيضا وشقرا او اسود مو مره اهتم وعلى وجهها فُل ميك اب~
–––––––––––
وبدأت أرسل رسايل شخصيه.. أرسل.. أرسل أرسل أرسل أرسل ومتابع بشكل غبي أبغا أي رد.. يومين وردت.. وتعرفت عليها وتمسكت فيها بمجرد اني عرفتها برسايل موقع تواصل اجتماعي, قد مره أرسلت رقم جوالي وككل بنت ع النت ارسلها رقم جوالي وما انتظر شي لأني عارف انها مارح تتصل.. هنا بدأت القصه ركز معايه,
يوما ما.. رن جوالي وانا فالبيت.. رديت.. ألو وجاني صوت وقتها لما سمعت الصوت كأن كل الأنوار الي فالدنيا انفتحت قدامي ومعنونه بالخط العريض فأعلاها جاك المنشود~
هذا الي تنتظرو من يوم وعيت ع الدنيا.. المهم ألو.. ألو.. أهلين.. كيف حالك الحمدلله بخير مين معايه.. صوت البنت خربطني تماما وحرك كل ساكن فالحياة كلها.. قلت مين.. قالت انا الي من الموقع.. كل ما سمعت حرف منها يضطرب وجودي.. قلتلها ممكن خمس عشره دقايق وأكلمك.. قالت طيب.. قفلت السماعه وأنا مضطرب تماما.. ابغا قوة خارقه الان ماعرف ايش هيا بس ابغا اسوي شي ما يصير الا بقوة خارقه.. الحمدلله هدأت.. شربت كاسة موية بدرجة حرارة معتدله.. ورجعت أتصلت.. ألو ألو أهلين يا هلا.. أنا: اش اسمك.. البنت: ريميانا.. أنا: ايش.. قالت: ريم – يا – نا أنا: والله ما فهمتك البنت: خلاص ريم ريم أنا: بس اش قلتي فالبدايه البنت: اسمي على اسم جدتي ريميانا
وأتعرفت عليها.. كنت كل ما أعرف شي عنها أنجذب لها أكثر.. عرفت انو لها أخوين أكبر منها وأخت أصغر منها.. وأنا عندي أخوين أكبر مني وأخت أصغر, وكل اسألتي عنها أجوبتها كانت تأكد انو هيا هذي البنت المفقوده الي قاعد أدور عليها منذ الأزل خلاص لقيتها ومعد في شي في الحياة اصلا الا ريميانا ريميانا هيا الحياة.. الحمدلله أخيرا أرسلها لي الله.. ولمدة اسبوعين دايما أكلمها وأتعلق فيها أكثر وأتنازل عن الدنيا وأتصوف أكثر وماني شايف شي اسمو دنيا اصلا ولا الحياة ولا أبغا شي الا البنت هذي..
لما سألتها عن حالتها الاجتماعية.. قالت انها مطلقه وكانت متزوجه واحد أبدا مو كفو للزواج, صاحبات طليقي كانو يجو شقتنا ولما أفتح الباب يسألوني وين زوجك !؟, فواضح ان البنت عاشت فتره زوجية فاشلة بكل المقاييس, طبعا انا استبشرت خير وبدأ أثيري يبتهج أكثر لأني أقدر أخلي ماضيها الزوجي ينسلخ منها.
ورحت للرياض وقتها كان عندي شغله أبغا أخلصها وأرجع جده.. طبعا جده الرياض الكره الأرضيه كلها والسما والفضاء أحلى شي فالوجود بعيني.. أنا كل شي حلو بعيني وما أبغا ولا شي الا البنت هذي, أرسلت سيارتي ورحت الرياض وحتى فالرياض كل يوم أكلم حبيبتي الغاليه.. وكل يوم أكتب شعر.. وأتزين وأتعطر وأتمخطر وأتبختر مدري ليه بس عايش حالة غرام تفسيرها الوحيد انو معد في شي اسمو هم.. عايش فعالم آآآآخر تماما كل يوم أكلمها الا لما أروح الاستراحه وحتى جلوسي فالاستراحه مخي طااااير فوووووق وأفكر فالبنوته.. والناس القراب مني الأصدقاء والصديقات قالولي عبدالله عمرنا ما شفناك متمسك بشي قد ما انت متمسك بالبنت هذي.. طبعا أحكيهم اش الي صار وكيف وفين لقيتها وعرفتها وليش أنا عاض عليها وماسكها بكل ما أعطاني الله من قوه وتقريبا كل الي يسمعني يسمعني فقط بدون أي مقاطعه وبصمت محتار مو عارف اش يقلي.. كيف يرد عليا وأنا فالحالة هذي.. بس فهمت انو الكل شايف بوضوح الشمس الحالة الي انا عايشها..
حتى في مره رحت الاستراحه وكنت اكلم البنت فالطريق لما وصلت قفلت منها ونزلت من السياره وانا داخل الاستراحه بخطوات هاديه قاعد اردد قصيدت نزار قباني الى رجل
وأنا داخل من باب الاستراحه لمجلس الاستراحه اقول
يا من يدخن في صمت ويتركني في البحر أرفع مرسـاتي وألقيهـا
وصلت المجلس وانا اردد القصيده فتحت الباب لقيت ابو ركون قدامي وانا اقول
ألا تراني ببحر الحب غارقـة والموج يمضغ آمـالي ويرميهــا
قال “الا والله اراك.. الا والله اراك”, المهم دخلت وجلست مع الشبيبه وانا كعادتي سرحان هيمان غرقان ولا عقلي مع احد الا البنت, رجعت جده كانت تمضي الأيام.. طبعا اكلمها كل يوم, لين جا يوم عادي كأي يوم, رحت حلقت ذقني عند فلبيني بعد ما حلقت ابتسم الحلاق قال عندك ديت اليوم.. رايح موعد غرامي ؟ ضحت انا قلتلو لا لا لا طبعا, سبحان الله ذاك اليوم اتصلت على ريميانا بعد العشا قلتلها تطلعي معايه ؟ (وأنا ما عمري خرجت مع بنت) قالت فين ؟ قلتلها اي مكان تبغي اي كوفي شوب.. قالت خلاص بعد ساعه تعال قهوة كذا قلت خلص تم.. رحت القهوه وجلست استناها فسيارتي لين جات ودخلنا القهوه سوى انا كنت بعكازتي السوده معطيتني وقار عاد.. وشكلي 10/10 وكل شي تمام.. طلعنا الدور الاول مافي جلسات اصلا فالقهوه الا الدور الاور وجلسنا على طاولة.. طلبتلها معسل عنب توت وجالس ادخن بس استأذنتها..
فاصله نقطه مهمه لازم تركز فيها مع الأخذ بعين الإعتبار أنا جاهل في عالم الجن والسحرة والمشعوذين وأعمالهم.. أنا مجرد انسان عايش في وطن الحمدلله والشكر آمن وحالي حال اي انسان عايش.. الفاصله هذي عشان احكيلكم ايش حكتني قصص حصلت مع البنت فحياتها ترسخت فذاكرتي.. طبعا المواقف الي بذكرها ما جات دفعه وحده جات مع كلامنا فأوقات متفرقه.. ركزو..
الموقف الاول:
اتذكر مره حكتني انها مرا راحت سبحت فبيت صاحباتها اتجمعو الصاحبات وكل وحده غيرت ملابسها وقعدو يسبحو وهيا سبحت ولما خلصو وطلعو يغيرو هيا ما لقت ملابسها الداخليه.. يا هو فين ما فين قالتلها صاحبتها صاحبة البيت خلص انا اجبلك ملابس داخليه حقتي وعطتها ولبستها طبعا ومشيت ورجعت البيت.. كانت تقول هيا سحرتني لأنها اخذت اثر مني وطبعا انا جاهل جاهل يا ناس لحد يلومني قعدت فبالي القصه لكن ما قدرت اسوي شي, بزر لكن كنت راسم خطه لوقت لاحق لكن مش الان الان ما اقدر اسوي اي شي.
تذكير.. انا شخص عشريني عايش حياتي كأي شاب وبعيد كل البعد عن عالم السحر.
نرجع للقصة
الموقف الثاني: اتذكر مره حكتني انها مره طلعت مع صاحباتها درة العروس درة العروس شاليهات ع البحر واعتقد مافي احد ما يعرفها وكانت تسبح مع صاحباتها جوة الشاليه تبعهم وشافت شي غريب.. تقول غطست مره وشافت وحده من صاحباتها منطقة العانه عندها عباره عن غابه تقول شي مو معقول شعر بشكل غير منطقي نهائيا منظر ما ينشاف ابدا وغير متوقع.. انا قلتلها يع قالت اشبك قلتلها لا بس تخيلت المنظر !!
تذكير.. انا شخص عشريني عايش حياتي كأي شاب وبعيد كل البعد عن عالم السحر.
نرجع للقصة
الموقف الثالث:
حكتني مره راحت مول لحالها.. قعدت تسوي شوبيق شويه بعدين تبغا تريح وتاخذلها كوفي او حلى, تقول جاها رجال سلم عليها وجلس معاها وقلها ريم انتي فيكي جني وتاعبك.. وانا مستعد اخرجو منك.. وانا عارف كل الي قاعده تمري في وتشوفي فأحلامك والكوابيس وما الى هنالك من امور الجني مو مخليكي فحالك فيها.. هوا للاسف مكانو في المهبل عندك ولازم انام معاكي بس ليله وحده عشان اخرجو منك.. قالتلو يعني ايش !! قال مارح يخرج الا لما تمارسي الجنس معايه عشان انا اعرف اتعامل مع النوع هذا مع الجن. طبعا سألتها اش سويتي رحتي معا بس ريحتني قالت لا طبعا اخذت رقمو قدامو على اساس اني بكلمو بس قام من طاولتي طبعا ما كلمتو ولا خطر على بالي اصلا.
تذكير.. انا شخص عشريني عايش حياتي كأي شاب وبعيد كل البعد عن عالم السحر.
نكمل القصة
الموقف الرابع:
بالحديث عن الكوابيس.. كانت دايما لما اكلمها تحكيني عن كوابيس شافتها.. وتجاوبني لما اسألها ايش الحلم.. قلتلها ايش رايك نفسر الحلم عند اهل الذكر وانا اعرف مفسر ممتاز دايما يفسر لصاحبي وتفسيرو يصيب.. اتصلت على صاحبي واخذت رقم الشيخ.. وعطيتها الرقم.. كلمت الشيخ وقالتلو جبت رقمك من النت قلها ما احط رقمي فالنت قالتلو بحثت عن ارقام مفسرين ولقيت رقمك.. عطاها موعد تتصل في ورجعت كلمتو.. وفسرلها الحلم ورجعت كلمتني ها كلمتي الشيخ قالت ايوا وبعد ما سمع الحلم صار يبكي ويقلي انتبهي على نفسك واقرأي على نفسك وكل كلامو وهوا قاعد يبكي.
تذكير.. انا شخص عشريني عايش حياتي كأي شاب وبعيد كل البعد عن عالم السحر.
نكمل السالفه
الموقف الخامس:
مره كنت اكلمها وقالت انا لازم اقفل عشان رايحه عند الشيخ يقرا عليا بس حلبس ستيانتين.. ضحكت انا قلتلها ليش !؟ قالت الشيخ وهوا قاعد يقرا عليا يجيب يدو على جسمي كلو على صدري وبطني قلتلها الله يلعنو.. قلتلها مافي شيخ يحسس على الي يقرا علي قالتلي والله هو يسوي كذا,
وواضح انها تأثير السحر المسوى لها قاعد يسيطر على وسوستها بإنو يوسوسلها ويغلب أفكارها.. اتذكر مره حكتني راحت عن شيخ يقرا عليها واول ما دخلت وجلست قدامو نزلت طرحتها وحجابها.. قام هوا نزل راسو وقلها تغطي.. وما رضي يقرا عليها, واضح تماما ان جني السحر قاعد يجبلها فالاماكن العامه سحره ويدلها على المشعوذين تروح يقرأو عليها
تذكير.. انا شخص عشريني عايش حياتي كأي شاب وبعيد كل البعد عن عالم السحر.
نكمل ما بدأناه
الموقف السادس:
أتذكر مره راحت للشيخ يقرأ عليها وبعد القرائه قلها انتي روحية, يبدو أن المُكَلَّف بسحرها زعيم من زعماء الجن.
الموقف السابع والأخير:
أخيرا اتضح لي ان حديثها كان كذب وليس حقيقة.. قرنائنا كانو يتناقلو كيف ترد البنت علي, مره سألتها كم تعطي نفسك عُمُر عقلياً وجاوبتني أربعين وأنا كنت دائما في حياتي لما أسأل نفسي نفس السؤال كنت أجاوب نفس الجواب (40).. كذلك عرفت ان اخوانها مختلفين ليس كما اخبرتني انها مثلي لديها اخوين اكبر منها واخت اصغر.. والله اعلم كم كذبة كذبتها, هي ليست ساحرة لكن لا تنسى بأنها مسحورة والجن يفعل كل ما بوسعه لإنجاح مؤامرته قدر المستطاع على أكبر قدر ممكن من الانس.
~
أهم شي أبغا أذكرو حصل في الموعد الغرامي.. انو خلال حديثنا انا والحلوه كانت تتذمر فسألتها عن ايش فيها وليش شايله هم الدنيا على راسها ايش في ؟ قالتلي عن انها ناقصهم هيا وامها واخوانها شوية فلوس تبعت احتياجاتهم العامه زي ايجار البيت واغراض البقاله أمور بسيطه.. سألتها كم تحتاجي وطبعا رفضت لكن اصريت انها تقول كم تحتاج.. ففرحت ان الامر بسيط ويمكن تدبيره.. ووعدتها ان راتبي قريب بينزل واول ما ينزل رح اعطيها ثلاثه الاف وخمسميه.. ركزو ركزو رجائاً فكلامي.. وعدتها أول ما ينزل راتبي رح أحول لها المبلغ أنبسطت وقالتلي أنا لازم ما أتأخر أكثر.. كلمت التكسي وجاها قلتلها خلص انتي روحي الله معاكي انتبهي على نفسك.. قامت أخذت جوالها وشنطتها ووقفت قالتلي انت جالس قلت ايوه حدخن سقارتين وامشي.. مدت يدها تسلم انا سلمت وبست يدها وتركتها ومشيت.. أنا بالعنيه ما وصلتها ربي حفظني منها ومن الي كانت ناويه تسويه لو وصلتها..
من بكره اتصلت وقالتلي تحولي المبلغ ؟ قلتلها لسه ما نزل.. قالت انت قلت حتحولي اليوم.. هنا بدأت وسوسة الشيطان تلعب دورها قالت انت قلتلي بكره رح احولك.. قلتلها اول ما ينزل ابشري رح ابلغك وخلال اليومين هذي ان شاءالله, قالت طيب بنبرة بينت انها زي ما تقول شايله فقلبها.. سألتها اشبك.. قالت مقهورة على الي قاعد يصير فسوريا..حاولت اهديها وقلت غلط نتعصب وننفعل واحنا ما نقدر نسوي شي.. قالت لا رح اظل معصبه ومقهوره ولا بهدأ لين يخرجو من مشكلتهم.. قلتلها طيب ليش معصبه لا انا ولا انتي نقدر نسوي شي لو بيدنا كان نتعصب اننا مهملينهم لكن ما بيدنا شي.. قالت الدول العربيه المفروض تتحرك وصارت تتكلم بهجوم انا ما كنت فاهم ان الشيطان قاعد يصرفها عني المهم حاولت اهديها مافي فايده.. سألتها انتي اقوى من الله قالت لا.. سألتها انتي اعدل من الله قالت لا..حاولت اروقها بس ما تبغا تهدأ معصبه ومنفعله.. فقلتلها خلاص اهدأي ونامي اليوم على خير وبكره اكلمك والله يفرجها على اخواننا فسوريا.. قالت ترا انت قلت انك اليوم الثاني رح تحولي قلتلها والله ما قلت قالت الا قلت وقفلت الخط, مو متأكد كيف نهاية المكالمه لكن مس اندرستاندق وشيء من هذا القبيل..
~
بعد سنوات انا تفرجت على محاضرات الشيخ حامد آدم الي تعامل مع عالم الجن 17 سنه وفعل ما فعل لكن تاب الله يغفرلو ويرحمو ويبدل سيئاتو حسنات, وجا يفيد الناس ويعلمهم انو انتبهو وكيف يتخلصو من السحر وكيفيات حاجات كثير يجب ان تكون بعين الاعتبار عند التعامل مع الاخرين مين ما كانو..
انتهت القصة.. لكن عندي بعض الكلام والنصايح لك ايها القارئ, كلامي مش تخويف من المشايخ.. لكن كلامي عشان تعرف انت قاعد تتعامل مع مين لو رحت لشيخ يقرأ عليك أو على أحد من أولادك أو بناتك.. الشيخ الوحيد الي ممكن يلمس المريض يكون يلمس رأسو.. ويكون يقدر يقرأ سورة الفاتحه.. يقدر ولي الامر او الشخص الي رايح للشيخ يطلب منو يقرأ سورة الفاتحة كامله قبل لا يبدأ قراءه عليه.. اعتقد مافي احد مو حافظ سورة الفاتحه الساحر او المشعوذ واي احد متعاقد مع الجن مايقدر يقرأ الفاتحه بالشكل الصحيح رح تلاقي تأتأه رح تلاقي الكلام داخل فبعض رح تلاقي ترتيب الايات مو صحيح.
كل ما سبق يا مسلمين في السعوديه بلد الحرمين, البلد الي فيها مكة وازيدكم من البيت شعر.. حتى مكه ما خلصت من السحره فأنتبهو لا تغلبكم النوايا الحسنه انكم تثقو ويغركم رجل عندو لحيه ولا لابس ثوب قصير او لابس شماغ بدون عقال, الدنيا لم ولن تكون يوما ما الا معركة تنتصر فيها بعبادة الله وحده لا شريك له, إن إبليس ليس عدواً بسيطاً وإنما أشد المخلوقات عداوةً للانسان.
سأذكر بإختصار قدر المستطاع نبذة عن الجن, الجن مذ خلقنا الله وهو ينافس الله في ما يملك وحاول أن يملك نفس المزايا.. وكل ما عند الله يملك الشيطان مرادفه.. وهو جاهر واعترف بأنه ند لله..
# فكما يريد الله لنا الجنه يريد الشيطان لنا النار.
# وكما يحبنا الله يكرهنا ابليس.
# وكما يريد ان يعطي الله كل سائل حاجته ليرتاح.. يريد ابليس ان يسلب كل ما نملك لنشقى.
# وكما يريد الله ان يدخلنا الجنه لنتنعم في نعيمها حياة خالده.. يريد ابليس ان يدخلنا النار لنتعذب بنيرانها الى الابد.
# كما يحترمنا الله واعطانا حرية الاختيار برضانا.. ابليس قَالَ أَرَأَيْتَ هَٰذَا الَّذِي كَرَّمْتَ عَلَيَّ لَئِنْ أَخَّرْتَنِ إِلَىٰ يَوْمِ الْقِيَامَةِ لَأَحْتَنِكَنَّ ذُرِّيَّتَهُ إِلَّا قَلِيلًا, أحتنكن يعني يجرنا جر كما تُجر الحمير والدواب الى حيث يقودها الراعي..
شياطين الجن ليس بسطاء, كيدهم ضعيف كما أخبرنا الله لكن من شدة خبثهم للسيطرة على البشرية أدلتهم من القرآن بطرق ملتوية فالافلات منهم يحتاج أن تفكر وأن يكون فكرك يمكنه تلخيص الرؤية من كافة الجوانب, والحرب قائمة الى يوم لا يبقى فيه مسلم تقي جَلِيْ الايمان..
مارح اقول انتبهو على انفسكم وخافو وكلام مرعب.. لا بس حاولو تحصنو انفسكم دايما بأذكار بسيطه نثبت بها لله اننا مؤمنين بالله وحده لا شريك له.
